"Раҫҫей чӑваш пики" - илемлӗхпе пултарулӑх уявӗ, тӗрлӗ вырӑнта пурӑнакан чӑваш хӗрӗсене пӗрлештерсе тӑракан уяв, чӑваш халӑхӗн пурлӑх культурипе ӑс-хакӑл культурине палӑртакан уяв. Унта чӑваш хӗрӗсен илемлӗ ҫи-пуҫӗпе капӑрлӑхӗ, юрӑ юрлас, ташӑ ташлас, сӑвӑ вулас, тӑван чӗлхепе тӗрӗс те илемлӗ калаҫас, чӑваш апат-ҫимӗҫӗ хатӗрлес ӑсталӑхӗ курӑнать. Чи кирли вара - чӑваш пикисем ҫак ӑсталӑха пысӑк сцена ҫинче кӑтартма пултарни, халӑха хӑйсен иксӗлми пултарулӑхӗпе паллаштарни, хӑйсен ӑсталӑхне аталантарни, ҫӗнӗ ҫитӗнӳсем тума тӑрӑшни, чун-чӗререн хавхаланни. 

Шупашкарти Туслӑх ҫуртӗнче ЧНК йӗркеленипе "Раҫҫей чӑваш пики"  конкурс 14-мӗш хут иртрӗ.

Кӑҫал илем конкурсне 16 пике хутшӑнчӗ. Тӗп титулшӑн Чӑваш Енри тӗрлӗ округри, Тутар Республикинчи, Ульяновск, Пенза, Тюмень облаҫӗсенчи хӗрсем тупӑшрӗҫ.

 💥Асӑннӑ конкурса

Патӑрьел тӑрӑхӗнчен «Пěтěмěшле пěлÿ паракан Пӑлапуҫ Пашьел вăтам шкулě» МБОУ 11-мӗш класра вӗренекен Анастасия Бахитова  хутшӑнчӗ.  

Жюри членӗсем пикесен пултарулӑхне, артист ӑсталӑхне хакларӗҫ, халӑх йӑли-йӗркине тата наци апат-ҫимӗҫне мӗнле пӗлнине тӗрӗслӗҫ.

Анастасия пур енӗпе те маттур пулчӗ. Пӗр пӑлханмасӑр, ҫухалса каймасӑр кашни конкурс витӗр ҫӑмӑллӑн тухрӗ.

Настя- вӗренӳ отличници, тӗрлӗ олимпиада, конкурс, фестиваль ҫӗнтерӳҫи, ЧР пуҫлӑхӗн стипендиатки, обществӑлла ӗҫсен хастарӗ, волонтёр...  Чӑн-чӑн маттур та сӑпайлӑ чӑваш пики!

Анастасия Бахитовӑна эпир Патӑрьел чысне тивӗҫлипе хӳтӗленӗшӗн ӑшшӑн саламлатпӑр, чунтанах тав тӑватпӑр, малашне те хастар та тӑрӑшуллӑ пулма, хӑйӗн ҫутӑ ӗмӗчӗсене пурнӑҫласа пыма ҫирӗп сывлӑх, ӑнӑҫу та иксӗлми телей сунатпӑр. 

Пирӗншӗн Настя – ҫӗнтерӳҫӗ!

«Раҫҫей чӑваш пики-2024» - Муркаш тӑрӑхӗнчен пулчӗ.

Светлана Кулакова