Пăлапуç Пашьел вăтам шкулĕн 9-мĕш класĕнче 7 ача пĕлÿ пухать. Кашниех вĕсенчен çывхарса килекен экзаменсене ăнăçлă тытма ĕмĕтленет. Ачасем кунсерен математика, вырăс чĕлхи, чăваш чĕлхи, обществознани, биологи, хими предмечĕсемпе шкулти вĕрентекенсем йĕркеленĕ консультацисене çÿреççĕ.

2022 çулхи пуш уйăхĕн 28-мĕшĕнче вара Чăваш Республикин вĕренÿ институчĕ чăваш чĕлхипе экзамен суйласа илнисем валли «Республикăн пĕрлехи экзаменне мĕнле хатĕрленмелле?» темăпа вебинар ирттерчĕ. Пирĕн шкултан чăваш чĕлхипе экзамен тытма палăртнисем вара пиллĕкĕн.

Анна Егорова доцент ертсе пынипе ачасемпе вĕрентекенсем республикăн пĕрлехи экзаменĕн тытăмĕпе паллашрĕç, изложенипе сочинени çырма, тест ыйтăвĕсене хуравлама хăнăхрĕç. Малтанхи çулсенчи экзамента тĕл пулнă паллăрах йăнăшсене тишкерчĕç. Çавăн пекех Анна Семеновна итлекенсем панă ыйтусене те туллин хуравларĕ, экзамена хатĕрленме кирлĕ материалсемпе, сайтсемпе паллаштарчĕ.

Вебинар ачасемшĕн те, вĕрентекенсемшĕн те усăллă иртрĕ.