Ака уйӑхӗн 20-мӗшӗнчен пуçласа 25-мӗшӗччен Патӑрьелӗнчи 2-мӗш вӑтам шкул вӗренекенӗсем тата вӗрентекенӗсем инçет майпа чылай ӗç туса ирттерчӗç. Çак эрнене эпир Аслӑ вӗрентекенӗмӗр Иван Яковлевича халалласа Чӑваш чӗлхи кунне туллин уявларӑмӑр. Палӑртнӑ мероприятисен шутӗнче Чӑваш Республикин Вӗрентӳ институчӗ сӗннӗ ӗçсене те пурнӑçларӑмӑр. Тӗслӗхрен, «Эпӗ чӑвашла калаçатӑп» акцие пирӗн шкултан 22 çын хутшӑнчӗ.  Вӗсен шутӗнче кӗçӗн, вӑтам тата аслӑ  классенче вӗренекен ачасем пулчӗç. Кашни хӑй чӑвашла калаçнине видео çине ӳкерсе хэштекпа интернетри тӗрлӗ каçӑмсене вырнаçтарма пултарчӗ. Кунсӑр пуçне, ака уйӑхӗн 24-мӗшӗнче «Пӗтӗм чӑваш диктантне» шкултан 91 çын çырчӗ:  57 вӗренекен, 21 учитель, 13 ашшӗ-амӑшӗ. Ытларах «5» тата «4» паллӑсем пулчӗç , «3» шучӗ нумаях та мар. Диктанта хастар хутшӑннӑшӑн пурне те пысӑк тав сӑмахӗ калатпӑр.

         Çак ӗçсемпе пӗрлех тӗрлӗ классемпе чӑвашла слайд-фильмсем курасси, виртуаллӑ мелпе Чӑваш наци музейӗнче пулса курасси, «Чӑваш чӗлхине сӑвапласа» ятпа сӑвӑсем каласси, Иван Яковлевӑн юмахӗсемпе калавӗсене вуласси, ӑна халалланӑ «О вас болел я душою» проектӑн ӗçӗ-хӗлӗпе  паллашасси питӗ туллин те анлӑн  пулса иртрӗç.

        Вӑрçӑ темипе пурнӑçланӑ ӗçсене те палӑртса хӑвармалла . Эрне тӑршшӗпех «Мы помним, мы гордимся!» акцие хутшӑнса пурте тенӗ пекех интернетра тест ӗçӗсем туса сертификатлӑ пулчӗç. Вӗренекенсем, çак акципе килӗшӳллӗн, вӑрçӑра çапӑçнӑ  аслашшӗ е кукашшӗсене асӑнса сӑнӳкерчӗксем , видеороликсем хатӗрлеççӗ. Пухнӑ материала интернетри тӗрлӗ çыхӑну сайчӗсенче вырнаçтараççӗ. Ку питӗ пысӑк пӗлтерӗшлӗ ӗç тесе шутлатпӑр.   

         Пӗтӗмлетсе çакна каламалла: Чӑваш чӗлхи эрни питӗ тухӑçлӑ иртрӗ. Пурне те саламлатпӑр, тав тӑватпӑр!